باين عطلت عليكم,, على فكرة هذي القصة من تأليفي ياشباب:
الحلقة الأولى...........
بطل قصتنا شاب ليبي اسمه{ مرزوق} طالب جامعي ظروف المادية متوسطة يعني ولد موظف راقد ريح
من الأخير ومتقاعد وراتبه 200 جنيه قبل الزيادة مرتبات وعايشين في حوازة و كانت عنده سيارة متاع بوه
نوعها بيجو504 {عقرب ريح } وإخواتي اللي يقرو في قصتي اللي ماتعرفش عقرب الريح معناها
ماتفرجتش في رمضان على مسلسل حاج حمد ... المهم سيارة مرزوق يوم يمشي فيها للجامعة و 10 أيام
يمشي عليه كرعيه..؟؟ قصديه رجليه وكان يسكن في مكان بعيد عن الطريق لاطير يطير ولا بشر يسير ,,
اسمه {العزيزية} لا فييها تاكسيات ولا أفيكوات ربع جنيه , الحزين كان يمشي عليه رجليه من حوازتهم
ساعتين بش يوصل الطريق وكان بذخ وشدت معاه وهو يمشي يلقى عمه {علي} رافع الساعي قصدي
الخرفان بيبيعه للجازرين } في {سوق الثلاثاء سابقا ,,,تعيشوا وتذكروا
وشوفوا جو ياشباب خوكم مرزوق بيمشي للجامعة وراكب في عكاري عمه {علي} ومعبيها خرفان وشوية
صناديق لما بيوصل الجامعة كيف بتولي ريحته ,,, المهم قاعد خونا مرزوق علي هذا حال عامين وشوي
لين كبده طابت وكنادراه {حذائه} بادت ورجليه صارلهم التعب وحتى وكان السيارة ولعت بيه بعد مايدوفها
بوه خوه كل يوم صبح ممكن العويلة يتحملوه لكن صحابه ملوا منا لين سمو {مرزوق والنبي دفه على
رحمة والدين} كل يوم يدفو بيه لين قالولا معدش تطفي سيارتك لما تجيه وخليها ولاعة لين تحضر
محاضرتك وأركب فيها وروح تي والله ماهو طامع فيه واحد ياحزين .....
تي حتى الخانب لما يركب فيها ويبيمناع ,,ينزل منها يجري ويخليك رسالة مكتوب فيها شينو مداير في
عمرك يا مسكين ,, حتى من دكاترة والأساتذة والمدرسين مسخفهم حاله المسكين وحتى لما ياخوش
محاضرة تأخير يقولولا خش ياولدي راك أنت واحد حزين ومافيش زيك مثيل ..مالا بنات الجامعة ؟؟ مش
كلهم قصدي اللي يتجاكترو على شئ مافيش لما يتعاركو مع بعضهم جروب يلقحوا عليه بعضهم واحدة
منهم تعزر في صاحبتها ,بري وإنت شكلك تحبي {ميزووق الحزين} ,,, معليشي شباب البنيه هاربا منها
راء .يااء..
المهم في يوم من أيامات في عطلة مابين فصلين الربيع والخريف مقعمز خونا مرزوق يفكر في كلام
واحد من الجروب قاله بيع رابش يامرزوق وحك جناب الشايب وجمع فلوس وعدي لي دبي وجيب
مركوب ... قاعد كلام صاحبه يدور في دماغ مرزوق وقعد 3 أيام يفكر في الموضوع وخصوصا لما قالا
صاحبه سيارات دبي أرخص من السوق {سوق الفلاح سابقا قبل إزالة لغرض تـ.....ر } فكونا شباب فكونا
من تلقيح خير ما يعاودوا يطوروني من جديد ... المهم خونا مرزوق عرض الموضوع على بوه وقاله
ياحاج خلينا نجيبو حتى هونداي معاقين قالو حقها غادي ماتفوتش4 الألف جنيه {جروا به جماعته مسكين},
والحاج تردد في أول وقال أنت يامرزووق بتسافر لي دبي أنا مانعباش عليك حتى لو بعاتك لسوق بوسليم
تجيبنا ليم لكن خونا مرزوق النية عشش في الموضوع وقنع بوه ووافق على الموضوع وتاني يوم بوه مشي
لعمكم {علي} وقالا عندي ناقة و بقرتين و عشرة خرفان والجدي بيعهم ليا بش مرزوق يشري مركوب من
دبي ,, وفعلا عمكم علي باع المعلوم وجاب لعمكم للحاج المقسوم , ومرزوق باع الشقفة لواحد مهبول و
تسلف من خاله وجمع الفلوس ومشى للسوق ذاهبين في المدينة قديمة وصرفهم دولارات وحجز تذكرة بش يسافر لي دبي ..
واليوم اللي بي سافر فيه مرزوق قاعد بوه يوصي فيه يا ولدي ردبالك يخنبو فلوسكم ,, رد بالك يبعولك
سيارة مقروضة {موخرين في العداد}, رد بالك يبعولك سيارة مخبوطة ,, رد بالك يبعولك ........ إلخ ,,,,,,,,
المهم بعد ماسمع خونا مرزوق الوصايا العشر قبل السفر وصل للمطار وركب الطيارة وعدى لدبي ,,,,
عيتوا ولا مازال ,, راهوا مزاال قصة الحزينة مابديتش حتى الماكسيما مازال من شريتش ؟؟؟؟
وبعد رحلة 3ساعات بالطايرة ياخوان وصل خونا مرزوق لي دبي بسلام وبعد ماوصل الحزين تفاجئ
بسوق الحرة وقال ياسلام ياحساب هذه هي دبي وهو قاعد ماطلعش من المطار جوا فوق الريح مطاعم
ومحلات وفنادق وكل شئ فيه ,,, وهو معذور ومسكين حتى معرض ط...لس الد.لي ماشاف فاشي من
عشر سنين فما بالكم بمطار دبي
المهم أجر تاكسي و قاله سوقني لي أرخص فندق ياعموا , رد عليه دريويل {السواق} الهندي : إيس كلام
,, سنو عمو , إنت وين تاريق {طريق}, رد خوكم مرزوق على الهندي على أساس فهومي ويدوي
إنجليزي وقال : أي واانت قووا توو ..توو.. فـــنـدق ,,,,,,؟
الهندي مافهمش وقالا : سنو ..تقول بابا‼‼ رد مرزوق وهو متعفلق قالا ياهندي أفهم,, نبي مكان واحد
مبنى كبير فيه نفر واحد يبي سرير ‼ وبعدها فهم الهندي أنا يبي يمشي للفندق ورفعه وين مايبي , المهم
مرزوق بات هذيك ليلة في الفندق ومش مصدقك أنا هو بدبي نوارة العرب ولؤلؤة الخليج , وثاني يوم
الصبح خوكم مرزوق حط فلوسه في جيبه وكان معاه 5000 دولار بس وتوكل وبديه يدور في معارض
السيارات المستعملة ويساوم في السيارات وهنا كانت صدمة القوية اللي ماكانتش تخطر على البال..أكتشف
مرزوق أنا أرخص سيارة غادي تساوي 6000 دولار من غير مصاريف الشحن والأمور التانية وهو
فلوسه مافتوش 5000 قاعد حاير مسكين ودمعته على خده ومعرفش كيف يدير وكيف بيروح بعد ماتسلف
وباع كل ماعنده بيش يجيب السيارة من دبي ,,, وهو واقف قدام معرض السيارات وقاعد يفكر خونا الحزين
شافه واحد من أخواننا الأمارتيين قال تفضل يا أخ وقولي شنوا مشكلتك ومايردك غير لسانك حنا عرب
وأخوان وبديه إمارتي اللسين أبولسان فصيح يرطب في خونا مرزوق بالكلام المليح وحس بيه عبيط ونيه
وبكلمتين بس ينضحك عليه وسأله إمارتي شين تبي , رد مرزوق وحكاله قصته الحزينة وكيف مالقاش
سيارة رخيصة بعد تشحوير اللي تشحوراه, ورد عليه إمارتي وقاله قول تم , تم, إنت ولد حلال وسيارتك
عندي ولي بتدفعه أنا راضي , استغرب خونا مرزوق في أول وبعدين استريح للراجل ومشيه معاه للمعرض
السيارات ولما وصلوا قال إمارتي إيش رايك فيها , رد مرزوق هي وينها بش نقول رأي فيها وأشار
إمارتي لمرزوق على سيارة ماكسيما {جي في} كحلة 30 حصان وتيتوا ودبل كامبيو ,ووو من الاخير فل
أوبشن ياشباب ,خونا مرزوق عيون قريب طلعه فيها ماكسيما وقال للأمارتي أنا فلوسي كلهم مايساووش
حتى خمس حقها رد عليه إمارتي كم عندك ,,قاله مرزوق 5000 دولار بس , قاله إامارتي مبروكه عليك
وحتى تكاليف شحنه هدية مني ليك , وفرح خونا مرزوق ووقع عقد سيارة وبوليصة الشحن ودفع الفلوس
من غير حتى مايجربها ويقوله بنطلع بيها للطريق وبنجربها بعدين هلبا هكي ماتجيش ساسي ويتشرط
..فقري. وعريس..
وروح خونا للفندق فرحان قريب يطير وبعد يومين توكل وروح للبلاد وقعد يعد في أيام بش توصله
سيارات الأحلام ,,,,
وفي الحلقة الثانية توا تعرفوا شين صار مع مرزوق لما روح لبوه ومعاه مفاتيح سيارة الأحلام
وإن شاء الله عجبتكم الحلقة الأولى وشكرا
الأحد سبتمبر 07, 2008 3:04 am
