ماكسيما مرزوق الملعونة جت من دبي انقلبت في ترهونة حلقة 2

الحلقة الأخيرة

وروح خونا للفندق فرحان قريب يطير وبعد يومين توكل وروح للبلاد وقعد يعد في أيام بش توصله سيارات الأحلام ,,,,

ولما حكاه لبوه عمكم الحاج على سيارة لشراها ونوعها بوه عيط عيطه لين سمعوه جيران في الحوازة اللي جنبهم: ووووووووووواه

فلوسي يامرزووووق ضحكو عليك يامنجووووه ,رفعتلي ضغطي قريب نموووت ,,ماكسيما شينو اللي تحكيه عليها بـ
5000 دوررر حتى دولار معدش قدر ينطقها عمكم الحاج من الصدمة الحزينة مسكين اللي قريب سقداتاه لأقرب جبانه

{مقبرة},,,,,,,

ومرت الأيام وخوكم مرزوق مسكين قريب يموت يفكر في الموضوع زعما سيارة توصله رسمي ولا ضحكو عليه وراحو منا الفلوس

,,,
وبعد 3 أسابيع جيه موعد البابور {السفينة} اللي بيجي فيها المركوب {ماكسيما }وخوكم من الخفة أجر كحلة وبيضه و توكل

ومشي لميناء الخمس مع علم أنا مكتوب في بوليصة الشحن كلمة هكي كبرها مكان الوصول : ميناء طرابلس وبعد ماضرب هذاك

المشاور وسأل في ميناء الخمس قاللوله أنت هنيه شين دير سيارتك وصلت ميناء طرابلس ياخفيف,,

ورجع لطرابلس وتم إجرااءت الجمرك وتخليص ومشيت أمور وجيت لحظة المنتظرة اللي كان يستنى فيها من سنين تي كان يحلم

بهونداي معاقين فجأة لقيه روحه طلع من الميناء ومروح في ماكسيما جي في ,,,,,,

نحس في روحي دهشتكم ياشباب معليشي سامحوني بس هانت قريب نوصلوا لفقرة الرعب والتشويق ,,,,

روح خونا مرزوق من ميناء بالماكسيما ومولع الفليتشات الأربعة ويكلكس بها لين وصل باب المزرعة وطلع عمكم الحاج يجري من

الحوش تقول شببوب ولد عشرة لين سبق ولده صغيراسماه { مرعي} وبعد ماركبوا فيها العويلة وداروا بيها دورا في العزيزية وكل

من شافهم من جيران قالوا منين جابوا فلوس وهما كانت عندهم عقرب ريح يوم تمشي وعشرة في ورشة التصليح,, وبعده فرحتهم بيها

السيارة عمكم الحاج دار عزومة وعزم كل جيرانه وأقاربه وأصحابه حتى هيا ماكسيما ... وثاني يوم خونا مرزوق ناض من صبح

ربي مش قادر يصبر أمتى تطلع الشمس بيش يمشي بيها الجامعة رغم إن حتى طرقاتها {لوحاتها} قاعدة جمرك ومازال ماتمش

أوراقها لكن سكر راسه ومشى بيها الجامعة بيش ينزل مواده للفصل الجديد .عند الحق صح يا شباب .. .

المهم خونا مرزوق أول ما خش بيها بوابة الجامعة شغلهم مسجل سيارة وعاله في صوته بيش ناس كلها تشوفه وبدي يتجكتر لدرجة

أنا واحد من صحابه اللي كانوا يدفوا بيه أيام الفقر والعزة ,ضبح عليه .يامرزوق يامرزوق .. فات عليه خونا مرزوق برابعة داير

روحه ماسمعاش وبعد ماوصل خونا قدام الكلية قعد يفكر وين ندرس وين ندرس سيارة أه لقيتها

أحسن مكان قدام باب كلية بيش يشوفوني جماعة وأنا نازل منها ,,ودرس مرزوق ونزل منها وهذيك لحظة طلبة اللي كانواواقفين قدام

الباب ويهدرزوا ويضحكوا صمتوا فجاءة كأنهم في مقبرة وكلهم يشوفوا لمرزوق لين نزل وسكر سيارته بجهاز الأنذار وخش للكلية

مش مصدقين أنا هذا مرزوق { والنبي دفه على رحمة والدين } اللي كانت سيارته يوم تولع وعشرة يدفوا فيها.. وكيف ومنين جاب

حقها ؟؟؟ وهلبا أسئلة قعدت تدور في روسهم وبدى مرزوق المنبوذ الي كان معنداش حتى قروب حديث الكلية كلها ومعندهمش سيرة

غير مرزوق وسيارة مرزوق ,, وفي خلال يومين بالكثير بدي مرزوق البيلو بتاع الكلية حتى من البنات بدوا يجروا في جرته ويتمنوا

حتى يعبرهم بكلمة بعد ماكان مسميناه مرزوق الحزين

وكان صاحبنا نقاله {البيله} إيشرين في الأسبوع مرة وكان شرين يعني بوه أكيد يبي يوصيه يجيب معاه دواء الضغط من الصيدلية

ولا قضية للحوش بس...لكن توا نقال من كثرة المكالمات من صحاب ومعجبات ومعاكسات بديه يصكر في نقال ,,من حقه حتى هيا

ماكسيما ,,,وبعد أيام بدى خونا تصير معاه حاجات غريبة في سيارة منها لما يروح لحوشهم ويدرس وينزل ويسكر سيارة وهو خاش

للحوش يتلفت يلقى ضيها سيارة والع فيرجع ويسكر مع علم أنا هو طفى ضوها قبل ماينزل وتكررت معاه الحاجة هيا أكثر من مرة

,, ومرات يلقى قزاز السيارة {روشن} مفتوح ويبدا هو متأكد أنا هو سكره قبل ماينزل وهذا كله ماعدلش خونا مرزوق قال مرات

خوي مرعي كان راكب فيها ونزل وخلى روشن مفتوح .. لكن الحاجة إللي أغرب كل من اللي ذكرته قبل في حاجة غريبة كانت

تصير شين تتوقعوا ياشباب؟؟

كان مرزوق لمايطلع بسيارة يشغل في المسجل ,,لي حد توا أمور تمام ولا شباب باهي شوفوا شين صار...

لما يشغل مسجل السيارة ويسمع أغاني يبدا كل شئ تمام لكن أول ما يغير شريط فيه أغاني ويحط شريط فيه قرآن تتلخبط أمور

السيارة وتبدا تخض {تقطع في ماشيها} في طريق وتنقص سرعتها ويبدا دومان {مقود} السيارة يرعش والمسجل يبدى يخرط

صوت يعلى

!! وينقص و شريط يبدا يخش ويطلع

استغرب مرزوق في بداية لكن يحسب أن شريط مرات فيه مشكلة فغير خونا على راديوا وبدى يسمع في قناة شبابية والليبة
إف إم لكن شين تتوقعوا صار ؟؟؟

نفس المشكلة تتكررت معاه يبدى ماشي بسيارة وامورها تمام ويسمع في أغاني لكن أول ماينادي صوت الحق {صوت الأذان} ويقول

المؤذن في راديوا {الله أكبر } سيارة ترجع لي نفس مشكلتها أولى ومرات تبدى سيارة تتكلكس ...{الكلاكس= صوت منبه سيارة}

بروحها بيش يغطي على صوت الأذان لين يتم ,, وبعد هذا كل خونا مرزوق الغشيم مازال ميش زابط شين فيه وقال أكيد مشكلة في

كهرباء السيارة وقرر يرفعها للورشة الصيانة للسيارات الحديثة وأول مارفعها للورشة ووصل بيها غادي وشوفوا الماكسيما العمال

اللي في ورشة فرحوا وقالوا : بص ياعم ديه عربيه ماكسيما .جي في. وصاحبها أكيد غني ومعبي ومستريح مش ممكن نسيبوه إلا

لما نألبوا{نقلبوه} بي ربعمية ولا خمسمية جنيه ولا مابأش أنا برعي ابن محمدين كهربائي ... ..معليشي شباب إخوة من مصر أم

زحمة
المهم نزل خونا مرزوق من السيارة

وجاه العامل المصري : إتفضل ياباشا أي خدمة

مرزوق : نبي كهربائي يكشف على السيارة

عامل المصري: إنت وصلت ياباشا إحنا عندنا قهاز{جهاز} يكشف العطل في سواني {ثواني}

مرزوق : باهي باه أكشف على السيارة وفكنا من جو متاع ياباشا ويا بيه متاعكم هوا معنديش غير 30 دينار راه 10 دينار

بنعبي بها بنزينة والباقي بنعطيهملك لما تصلح سيارة

عامل المصري : رد باستغراب؟؟ عندك عربيه ماكسيمه ومعندكش غير ثلاثين جنيه لييه؟؟
مرزوق : بتصلح السيارة وأنت ساكت ولا نشوف ورشة ثانية ...
عامل المصري : لا ياباشا أنا بهزر معاك بس مهم إنت تكون راضي من شغلنا
مرزوق : هذا فاش فالحين يامصريين دوى بس وضحك على ذقون ...
المهم بدى عامل المصري يكشف على السيارة فتح غظاء المحرك وبدى يدور في مشكلة منين وهو يكشف على السيارة بالجهاز شين تتوقعوا صار ؟؟
الجهاز اللي يكشف على سيارات وقف معدش يخدم يعني صارله ستك من الاخير رغم أنه جديد ما ليشي فترة كيف شرينه استغرب عامل وقال ديه أول مرة قهاز بيعطل ومايشتغلش .. وبعدها بشوي المصري يخبطه ضيئ بقوة 220 فولت ينطره فوق ويخبط راسه في غظاء المحرك ويطيح على أرض وصاحباه جوه يجروا بيش يقيموا ويسعفوا ..مع العلم أنا جهد باترية {نضيدة} السيارة مايفوتش 60 فولت ..
وأول مافاق المصري قال : روح ياعم الله يسمحك أنت وعربيتك النحس ديه بطلنا شغل خالص ..
وركب خونا مرزوق في سيارته وطلع من ورشة وقاعد مازال ماستوعبش اللي صار
ومرة ايام على موقف الورشة ...
وفي يوم من أيام مرزوق كان قاعد في الكلية يهدرز على صحابه وسمع منهم أنا طريق قرقارش كل يوم خميس في ليل حكاية شايشة سيارات أخر موديلا ت وبنات ومعاكسات وجوه من الاخير وخصوص أنا هو سيارته ماكسيما ومظلمة وفيها منظومة ليزر,,وزهت الفكرة في راسه وبدى يفكر يمشي حتى هو وبعد تفكير قال هما مش خير مني و قرر يمشي الخميس جاي وبهيج زيا زي غيره
المهم جاء يوم الخميس ومشى خونا مرزوق بروحه .ركزوا في هذي كلمة بروحه . لي طريق قرقارش في ليل وخطم على محل أشرطة وشري هلبا أشرطة أغاني عربية وأجنبية بيش يقولوا ناس سميع وجوه مليح ...
وخش خونا لطريق قرقارش وعلى في صوت المسجل وبدي يجري بسيارة ويسطرب بيش يشوفه ناس بس في حاجة لاحظها مرزوق ومافهمهاش اللي يشوفه في طريق يقعد يهزب فيه .. واحد يقوله احترم نفسك ياشاب وواحد يقوله خزي عليك و واحد يقوله تحشم معاك العويلة ..؟؟؟ ركزوا في الجملة اللي قلتها توا تحشم معاك العويلة ؟؟ بس مرزوق بروحه أي عويلة يحكوا عليها ,, فاتهم مرزوق وكمل هياجته ...
وبعده بيومين يعني يوم السبت لما جاء الكلية تلقى معا واحد من أصحابه وقال خيرك يامرزوق معدش تتحشم رفع معاك عويلة لقرقارش وفتح مسجل بصوت عالي وتسطرب
عيب عليك ياراجل مانحسبكش هكي ...
قاله مرزوق أي عويلة اللي تحكوا عليها كلكم ورد عليه صاحبه مش كانوا راكبين معاك أربعة نسوين لبسين فراشيات ...؟؟؟
استغرب مرزوق وقاله أي نسوين تحكي عليهم أصلا أمي متوفية ليها عامين وماعنديش خوات بنات وحتى لو عندي بيلبسوا فراشيات شين تخرط ياخوي أكيد غالط ..
استغرب صاحبه ومعدش عرف شين يقول لكن هو متأكد أنا اللي شافه مرزوق ومعاه العويلة..
طولت بيكم ياشباب صح خلاص هانت قريب تم قصة ووصلنا للجزء المشوق من قصة
وفي يوم من أيام رن تلفون عمكم حاج والد مرزوق وقالوله الحاج عبد السلام توفى في ترهونة ودفينته غدوا العصر ...
فقرر الحاج يمشي لترهونة ويحضر الدفينة ويعزي عاد عيب الحاج عبد السلام كان جاره وكانوا يلعبوا في كارطة ورومينوا معا بعض معا قروب الشيابين في العزيزية وقداش ماربحوا دوريات رمضان في شكبه معا بعض .....
وثاني يوم توكل مرزوق هو وبوه بالماكسيما لترهونة وطبعا طول الطريق مرزوق مطفي مسجل حشومة مايقدرش ياسمع أغاني قدام الحاج لين وصلوا لترهونة وحضروا الدفينة وعزوا وبعدها الحاج قال لمرزوق أنت روح وأنا توا بعدين نروح معا عمك علي نسايره في طريق ..
فرح مرزوق وركب السيارة ولبس حزام أمان وتوكل وشدها جري في طريق فلما شغل مسجل حط شريط قرآن بلغلط يحسبه شريط نانسي عجرم وأول ماشتغل شريط وتليت أيات من ذكر الحكيم
حس مرزوق بحد ضربه على راسه تلفت التالي ماشافش حد خاف في أول لكن قال مرات أنا نتخيل لأني في طريق سفر وبروحي ومرات يبدى شخص يتخيل في حاجات مش ليه ..
وبعدها مشى وكأن ماصار شئ ولما هو ماشي وقبل لما يوصل لبوابة الهيشة اسمع مرزوق صوت واحد يكلم فيه من خلف وقاله بلهجة إمارتية : ماعندك شريط خليجي توحشنا أغاني الخليجية يامرزوق ورد عليه ثلاث أخرين مع بعضهم بصوت واحد : إيه والله صدقت ....
خونا مرزوق من خلعة تلفت التالي وشاف حاجة عمره ماكان يتوقع يشوفها في حياته؟؟؟؟
تذكروا لما ناس كان يهزبوا في مرزوق في طريق قرقارش ولما جاه صاحبه كلمه وقال عيب عليك يامرزوق اللي دير فيه معاك العويلة؟؟
العويلة الي يحكوا عليها هما عبارة على أربعة من جان من دولة إمارات والفراشيات اللي شوفها ناس هي عبارة عن سورية عربية وغترة وشماغ أبيض بس ناس يحسبوهم نسوين لبسين فراشيات لأن دنيا كانت ليل وسيارة مظلمة فماكنوش واضحين من بعيد ...
ونرجعوا لمرزوق لما تلفت لقاهم ثلاثة مقعمزين من خلف واحد من قدام الحزين من الخلعة طلق من إيديه دومان {مقود} السيارة وقعد يعيط بأعلى صوت جن جن ...
مسكين من خلعة مقدرش يجمعهم ويقول جنون , جنون ,,,,وبعد ماطلق دومان من إيده وهو كان يجري بسرعة حوالي 100 , 120 من حظه لأن كان قريب من بوابة ....
اختل توازن السيارة وطلعت بيه برا طريق وخشت في رملة وانقلبت بيه السيارة وخونا مرزوق بعدها فقد الوعي ومعدش يندري على شئ لين حل عيونه ولقى روحه في المستشفى مكسر ومجبس ومعاه بوه وعمه علي ومجموعة من صحاب بوه ...
وأول مافاق مرزوق بدى يصيح السيارة ... المسجل ..الشريط الخليجي .. الجنون ...
يحسبوه يخرط من تأثير الحادث لكن مايندروش شين شاف المسكين ...وستر ربي أنا هو كان لبس الحزام وما تنطرش من السيارة كان هذا راهو مات
وبعد أسبوعين من الحادث طلع من مستشفى لكن مسكين حالته النفسية تعباه وبدى يحلم في ليل ويقعد يحلم بيهم ,,عند حق حتى هما أربعة جنون ...
وسيارته الماكسيما تصوروا رغم أنها انقلبت بيه لكن أضرار الي فيها كانت بسيطة وجابولها رافعة وروحوا بها لحوش مرزوق وقعدت مدرسة في حوزاة
وقد ماحاول فيه بوه وقاله خوذ فلوس وارفع صلحها قال مرزوق شئ معدش بنركبها
ومرت أيام وقعد يحاول يتذكر اللي صار معاه وكيف طلعوا جماعة اللي معاه في سيارة وشين قصتها وهلبا أسئلة قعدت تدور في راسه بعدين مرزوق تذكر حاجة ؟؟شين هيا؟؟
تفكر أنا رقم موبايل الرجل صاحب المعرض إمارتي اللي باع له سيارة قاعد مسجل عنده في عقد بيع ودور عليه ولقاه واتصل بيه وشين تتوقعوا إمارتي قاله بعد ماحكاله مرزوق على حوادث اللي صارت معاه...
رد عليه إمارتي صاحب معرض سيارات وقاله إن قصة هذي سيارة كان يملكها رجل إمارتي غني وتاجر وبخيل وكان عنده بواب هندي ديما كان يعامل فيه زي حيوان أكرمك الله وكان يضرب فيه وشهر يخلصه وشهرين مايعطيشي شئ وكان يسب فيه ومايحترمش فيه نهائ وفي يوم من أيام قرر الهندي ينتقم من هذا رجل ومشي لي ساحر بيش يدير له سحر ينتقم بيه من راجل اللي يخدم عنده وعطاه المشعوذ حجاب يحط تحت كرسي سيارة بيش يسكنوا فيها جماعة وسخر المشعوذ أربعة من الجان بيش ينتقموا من راجل وفعلا انتقموا منه وخلوه مهبول راقد في مصحة نفسية وخسر كل ثروته وفلوسه وفلس وقعد على حديده وأخر حاجة قعدت له سيارة الماكسيما جت زوجته وبعتاه بأرخص ثمن بيش تسدد مصاريف علاج زوجها اللي في المصحة وقعدت سيارة مدرسة في معرض وما شراها حد لأن معظم ناس عارفين قصتها لين جت أنت وشريتها يامغفل .......
وسكر إمارتي تلفون على وجه خونا مرزوق تلفون ...
ومن هذاك اليوم قرر مرزوق معدش يركب سيارة الماكسيما الملعونة اللي جت من دبي وانقلبت في ترهونة ...
وقعدت سيارة مدرسة في حوازتهم وهو رجع يمشي على رجليه لين دار عقرب ريح ثانيا
وعلق عليها ورقة مكتوب فيها: ياشارب اللبن أرجع للمياه
وتمت قصتنا وأن شاء الله تكون عجبتكم وماطولتش بيكم وشكرا
خوكم حاصد الأرواح